ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាក់ប្រាប់ឯកអគ្គរដ្ឋទូតអាមេរិកប្រចាំកម្ពុជា លោក Patrick Murphy ថាកម្ពុជាកំពុងរៀបចំជំរុញការស្រាវជ្រាវ និងជីករកអដិ្ឋធាតុជនជាតិអាមេរិកដែលបានបាត់ខ្លួននៅកម្ពុជាក្នុងសម័យសង្គ្រាមឱ្យបានរហ័ស និងជោគជ័យ។ ការបញ្ជាក់នេះក្នុងជំនួបរវាងនាយករដ្ឋមន្ត្រី និងឯកអគ្គរដ្ឋទូតអាមេរិកនៅកម្ពុជាព្រឹកថ្ងៃទី២៧ ខែកញ្ញា ឆ្នាំ២០២៣។

ក្នុងជំនួបមួយនៅវិមានសន្ដិភាពព្រឹកថ្ងៃពុធនេះ សម្ដេចធិបតី ហ៊ុន ម៉ាណែត បានថ្លែងអំណរដល់អាមេរិកចំពោះការផ្ដល់ជូនឡើងវិញនូវជំនួយមកកម្ពុជាដែលមានតម្លៃប្រមាណ ១៨លានដុល្លារអាមេរិក ជាមួយនឹងការបន្តផ្ដល់ជំនួយឡើងវិញនេះសម្ដេចធិបតីបានបញ្ជាក់ប្រាប់អគ្គរដ្ឋទូតអាមេរិកប្រចាំកម្ពុជាថា រាជរដ្ឋាភិបាលកម្ពុជាបច្ចុប្បន្នបានរៀបចំកែសម្រួលសមាសភាពនៃគណៈកម្មការ POW/MIA ក្នុងការសម្របសម្រួល និងសហការជាមួយគ្រប់ភាគីពាក់ព័ន្ធទាំងអស់ដើម្បីអនុវត្តបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួន ឱ្យបានរហ័សទាន់ពេល និងជោគជ័យ «ប្រកបដោយកាយវិការនៃការគោរព និងស្រឡាញ់ ចំពោះក្រុមគ្រួសារនៃយុទ្ធជនដែលបានបាត់ខ្លួន»។

ក្នុងជំនួបនោះសម្តេចធិបតី និងឯកអគ្គរដ្ឋទូតអាមេរិកក៏បានប្តេជ្ញាចិត្តផងដែរ ក្នុងបន្តនូវកិច្ចសហប្រតិបត្តិជាមួយគ្នា ឱ្យកាន់តែជិតស្និទ្ធបន្ថែមទៀត សម្រាប់ជាឧត្តមប្រយោជន៍នៃប្រទេសទាំងពីរ។

អតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ធ្លាប់បានលើកឡើងថាមានទាហានអាមេរិកជាង ៨០នាក់បានបាត់ខ្លួននៅក្នុងប្រទេសកម្ពុជាអំឡុងសម័យសង្គ្រាមវៀតណាម ហើយជាងពាក់កណ្ដាលត្រូវបានគេរកឃើញគិតមកដល់បច្ចុប្បន្ន។

ការស្វែងរកអដិ្ឋធាតុរបស់ជនជាតិអាមេរិកនៅកម្ពុជាធ្លាប់ត្រូវបានផ្អាកកាលពីឆ្នាំ២០១៧ បន្ទាប់ពីមានការរកាំរកូសរវាងរដ្ឋាភិបាលកម្ពុជានិងអាមេរិកបន្ទាប់ពីមានការចាប់ខ្លួនមេដឹកនាំបក្សប្រឆាំងដែលតុលាការចោទប្រកាន់ពីបទក្បត់ជាតិ ហើយអាមេរិកបានរឹតបន្តឹងទិដ្ឋាការប្រឆាំងមន្ត្រីជាន់ខ្ពស់កម្ពុជា។ ទោះជាយ៉ាងណាការរុករកនេះត្រូវបានបន្តវិញនៅឆ្នាំ២០១៨ តែហាក់បីដូចជាមិនទាន់រលូនដូចមុននោះទេ។

សម្រាប់រដ្ឋាភិបាលអាណត្តិថ្មីដែលដឹកនាំដោយនាយករដ្ឋមន្ត្រី សម្ដេចធិបតី ហ៊ុន ម៉ាណែត ទំនាក់ទំនងកម្ពុជា-អាមេរិកចាប់ផ្ដើមមានទំនាក់ទំនងល្អនឹងគ្នាវិញបន្ទាប់ពីសម្ដេចធិបតីអញ្ជើញធ្វើដំណើរទៅចូលរួមមហាសន្និបាតអង្គការសហប្រជាជាតិនិងបានជួបអនុរដ្ឋមន្ត្រីការបរទេសប្រចាំការសហរដ្ឋអាមេរិកលោកស្រី Victoria Nuland កាលពីថ្ងៃទី២២ ខែកញ្ញា ឆ្នាំ២០២៣៕